Bangladesh -(WARSOOR) – Mudaaharaadyo rabshado wato ayaa Jimcihi maanta mar kale ka dhacay dalka Bangladesh, iyadoo ay booliska iyo ardayda horkaceysa dibadbaxyada ay iskula dhaceen qeybo ka mid ah magaalada caasimadda ah ee Dhaka.
Booliska ayaa adeegsaday suntan dadka ka ilmeysiisa, iyaga oo mararka qaarna ridayay rasaas nool. Wargeysa Prothom Alo ee dalkaasi ayaa ku warramay in adeegyada tareennada laga joojiyay guud ahaan waddanka, kaddib marki ay dibadbaxayaasha xireen waddooyin, halka kuwo kalana ay dhagxaan ku tuurayeen ciidamada amniga.
Dibad-baxayaasha ayaa dalbanaya in la soo afjaro nidaamka cusub ee kootada shaqada, kaas oo dhigaya in ilaa 30% shaqooyinka dawladda la siiyo qaraabada dadki kasoo dagaallamay dagaalkii madax-bannaanida ee Bangladesh ee sannadkii 1971-kii.
Saddex qof ayaa la xaqiijiyay in ay ku dhinteen bannaanbaxyadi maanta. Guud ahaan dadka ku dhintay tan iyo marki ay billowdeen bannaanbaxyadan todobaadki hore, ayaa waxaa ku dhintay dalka Bangladesh ilaa 27 halka ku dhaawacmeen ilaa 1,500.