𝗥𝗮’𝗶𝗶𝘀𝘂𝗹 𝗪𝗮𝘀𝗮𝗮𝗿𝗲 𝗫𝗮𝗺𝘀𝗲: 𝗪𝗮𝘅𝗮𝗮𝗻 𝗿𝗮𝗷𝗲𝘆𝗻𝗲𝘆𝗻𝗮𝗮 𝗶𝗻 𝗮𝗮𝗻 𝗮𝗿𝗮𝗴𝗻𝗼 𝗦𝗼𝗼𝗺𝗮𝗮𝗹𝗶𝘆𝗮 𝗰𝘂𝘀𝘂𝗯 𝗺𝘂𝘀𝘁𝗾𝗮𝗯𝗹𝗸𝗮 𝗱𝗵𝗼𝘄, 𝗦𝗼𝗼𝗺𝗮𝗮𝗹𝗶𝘆𝗮 𝗸𝗮 𝘅𝗮𝗿𝗼𝘄𝗱𝗮𝘆 𝗱𝗲𝘆𝗻, 𝗔𝗹-𝗦𝗵𝗮𝗯𝗮𝗮𝗯 𝗶𝘆𝗼 𝘅𝗮𝘀𝗶𝗹𝗹𝗼𝗼𝗻𝗶 𝗱𝗮𝗿𝗿𝗼 𝘀𝗶𝘆𝗮𝗮𝘀𝗮𝗱𝗲𝗲𝗱

Muqdisho – (WARSOOR) – Ra’iisul Wasaaraha XFS Mudane Xamse Cabdi Barre oo ka qeyb-galay Munaasabad Af-fur ah oo lagu maamuusayey sannad-guuradii koowaad ee ka soo wareegtay markii howlgalkii hore ee AMISOM loo beddelay ATMIS, ayaa uga mahadceliyey dadaalkooda naf-hurnimada ah ee ku aadden nabadeynta iyo xasillinta Soomaaliya.

Ra’iisul Wasaaraha, oo ka hadlayey horumarka laga gaaray dagaalka dalka looga xoreynayo kooxaha Khawaarijta ah, ayaa tilmaamay in Xukuumadda DanQaran ay ku guuleystay xoreynta in ka badan 70 magaalo iyo tuulooyin dhaca saddex gobol oo muhiim ah, kuwaas oo hadda xor ah, dowladduna ay ka hirgelinayso adeegyadii aasaasiga ahaa ee bulshada.

“Waxaan rajeyneynaa in aan aragno Soomaaliya cusub mustqablka dhow, Soomaaliya ka xarowday deyn, Al-Shabaab iyo xasillooni darro siyaasadeed. Waxaana ku han-weynahay xaqiijinta taageero aan ku hiigsanno himilooyinkeenna istiraatijiga ah”. Ayuu yiri Ra’iisul Wasaare Xamse.

Xukuumadda DanQaran oo dagaalka Argagixisada ku wajahday weerar saddex Jiho ah oo muhiim ah, ayuu Ra’iisul Wasaaruhu sheegay in ay horseedday jab-xoog leh. Waxa uuna intaa raaciyay in waddamada dariska ah ay diyaar u yihiin in ay ku soo biiraan howlgalka ciribtirka Khawaarijta.

Ra’iisul Wasaare Xamse Cabdi Barre ayaa tilmaamay in Xukuumaddiisu ay sii wadi doonto wada-shaqeynta dhow ee ay la leedahay ATMIS iyo saaxiibada Caalamka, si loo xaqiijiyo Soomaaliya horumar iyo xasillooni ku naaloota.